عربة مترو
يجلس مجموعة من الأشخاص غير مبالين بشيئ ، وفجأة يتوقف المترو فلا يظهر اي اهتمام علي احدهم
يقوم شاب تلاتيني ملتحي يلبس جلباب : يا جماعة المترو وقف
*صمت*
- الشاب : عارفين المترو وقف ليه ؟
*صمت*
- علشان انا هفجره ، هاهاهاهاهاهاها
*صمت ولا مبالاة*
- ايوة انا هفجرة ، دي خطة عاملينها ، الاخوة هيوقفوا القطر من بره ، وانا هفجره بالحزام الناسف اللي انا لابسه ده *يرفع الجلباب ويظهر الحزام الناسف *
*ينظر له الجميع نظرة غير مبالية .. اللي هو ايوا عايز ايه يعني يا ابن الوسخة انت!
الشاب منفعلا : ايه ؟ انتو مش خايفين ؟
الحاج اللي هناك ده مش خايف ؟
= واخاف من ايه يا ابني ؟
- يعني حزام ناسف وهفجركم وبووم وبتاع شوية اهتمام يعني مش كدا !
= فعلا ؟
- حهزر معاك يعني ؟ مش لسه موريكم الحزام الناسف من شوية ؟
= طيب يعني عايز ايه ؟
- بقولك حفجركم وحزام ناسف ؟ هكون عايز ايه يعني ؟ ربع لانشون وبجنيه فينو ؟
= ما تبطل سخافة بقي يا ابني هتبقوا انتو والزمن وريحة باط ابن الكلب الواطي اللي جنبي ده علينا ؟
- ما انت اللي بتستفزني يا حاج
= انا ؟ ليه ؟
- مش خايف
= واخاف من ايه ؟
- من الحزام الناسف والتفجير وكدا
= فعلا ؟
- مش ملاحظ اننا بدأنا نلف ف سركل وسخة .. وانا مبحبش دماغ العواجيز ده ، ما تخلنيش اخلع الحزام والفه حوالين رقبتك اخربأك .
= بس يا ياض
- يعني مش هتخاف ؟
= يا ابني بطل تفاهة بقي وان كنت هتفجر اخلص ، اهو علي الأقل تريحني من ريحة عرق القذر اللي جنبي ده .. *بصوت عالي وصراخ* .. استحموا بقي يا ولاد الكاالب
- اسف يا حاج .. طب وبالنسبة لام محمد اللي هناك دي مش خايفة ؟
= واخاف من ايه ؟
- ياا دين والدي .. ما تبطلوا وساخة المصرين دي بقي .. تخافي من ايه ؟ تخافي من اني لابس ديك ام حزام ناسف اهه ، اهه .. هشد ام الفتيل وافجر نفسي ف اهاليكم !
= وبعد كدا يعني المترو هيمشي ؟
- مش عارف .. مش هبقي موجود ساعتها الصراحة
= طب فجّر ياللا بسرعة والنبي يا ابني علشان سايبة الأكل علي النار
- أقسم بربي أ انتو خسارة فيكم تمن الحزام الناسف ده ، انتوا عايزين حزام جلد بتوكة ويتقطع علي فخادكم يا رمم
- طب وبالنسبة للأخت اللي لابسة الهيد فون دي ودونت كير ممكن حضرتك معانا هنا شوية ؟
- يا اخت ، يا اخت ؟
- يا وسخة ؟ *يشد الهيد فون من ودنها
= اووه ماي جود ؟ ايه قلة الادب دي ؟
- معلش بس ثانية معانا فيه تفجيرات وحاجات هتحصل دلوقتي فبنستأذنك تعملي بوز لمنير او حماقي او هو ايفر اللي بتسمعيه يعني وانا هبعتك جهنم دلوقتي معاهم شخصيا
= ايه ده انت هتفجر المترو ريللي ؟
- ام نوت شور الصراحة ، بس اي ويل تراي يعني
واي بروميس اني ها دو ماي فاكين بيست علشان انهي حياة امثاك مش اكتر
= طب اشطه ، ممكن اخد سيلفي وارفعها بعد اذنك علي انستاجرام "انا والإرهابي" .. وااو هتبقي اوسام اوي ؟
*يخبطها رجل ف بطنها تاخد باب المترو وتنزل*
*يعدل هدومه* : ها يا جماعة .. ما حدش خاف لسه ؟ .. الاستاذ اللي هناك ده ؟ ايوا انت اللي معاك كيس الفاكهة مخوفتش ؟
= واخاف من ..
- بااس يا وسخ .. ادخل ف الموضوع علطول
= الصراحة مش فارقة .. كل اللي قالقني انك لو ضعفت ومقدرتش تفجر المترو ، هعيش واطلع من المترو اركب ميكروباص زحمة والسواق يغلي الأجرة ويتخانق وياكل مطبات وينزلني ف مكان فيه صرف صحي طافح وزبالة اروح اتخانق معاها ف البيت علشان ما اهتمتش وعملت اكل للكلب اللي شقيان بره ، واكل اي حاجة من التلاجة وانام فتصحيني علشان انزل اكشف ع الواد واجيب حقن ولبوس وادفع مصاريف والشهر لسه ف اوله واكمله سلف وللأسف مش عايز اموت كافر ومش بعد ده كله يعني اعلق نفسي ف يافطة وابقي فرجة وناس تافهة زيك تقول عني مات كافر ويقولوا عنك انت شهيد .. بص يا ريت تنجز وما تضعفش وتنهي الموضوع حالا .. ما تشعبطناش بالأمل وتندّل
- ميتين البؤس الصراحة ،
- علي فكرة ، انا كمان ، انا كمان زيكم واكتر حياتي كلها مليانة لبوس ، وعرق باط واكل ما خلصش
خلصت تعليم وشهادة تقريبا امي رميتها او باعتها مع الكتب القديمة بالكيلو باين او ولدي الله يسامحه استعملها ورق حمام .. الماية بتقطع كتير اصلها .. احب واحدة وتسقعلي علشان فاشل ، ادخل ابعت لواحدة علي الفيس تاخد سكرين شوت وتقول عني حكاك وشغل وسخ
.. وانا كمان مكنتش عايز اموت متعلق في حبل وعيال لزجة وعميقة تكتب عني بوستات ، كان لازم اموت موتة عدلة يعني .. بس للأسف حتي دي مش ناجخ فيها
*يطلع سكينة مطبخ ويرشقها ف بطنه ويموت*
*تبتعد الكاميرا لفوق ..
اصوات متداخلة متباعده
طب ايه بقي المترو هيمشي دلوقتي يعني والا ايه ؟
ابعد باطك دي كدا بقي علشان ما اسبلكش يا ابني يا قذر
لو سمحت يا باشا نازل الجاية ؟
No comments:
Post a Comment