عجائب_الشقة_السبع
ليه ... ؟
هو ده السؤال ... ليه بنجيب البلاوي دي كلها فى الشقة ...
ليه ما بنكتفيش بمراية فى الحيطة و فرشة شعر دبابيس تتنيل تترمي في اي حتة و خلاص و مكان محترم فى المطبخ نشيل فيه الصيني و دولاب عملي واحد ندفس فيه فوط مسح اللامؤاخذة الوش .. ؟؟؟
ليه الجواز لا يتم الا بوجود بعض الخشبيات في البيت زي التسريحة ... و الشوفونيرة ... و الكومودينو ... و النيش ... البوفيه
ايه الاسماء التافهة دي اساسا ؟؟!!!
#التسريحة
يعني ايه اجيب بتاعة خشب ادفع فيها كذا الف جنيه عشان
احط عليه مراهم كريم الوش اللي بيشقق من اللطم .. و جل الشعر اللي بيقع من الهم .. و الكولونيا اللي بنسفها عشان ننسى مصاريف المدارس و ازاة زيت دابر قملة اللي بتفضل على الرف اربعين سنة جواز و بعدين تترمي من الورثة ؟؟؟
ليه لازم درج عشان فرشة الشعر ؟؟ هي حتجري ؟؟ حتهرب باللي في بطنها مثلا ؟؟؟
ليه لازم درج عشان البنس و عشان التوك و عشان المقياج ؟؟؟
ليه درج عشان المقياج ؟؟ الرطوبة حتبهدله مثلا ؟؟؟ يحرق المقياج و سنينه السودة
#الشوفونيرة
ايه الغلاسة دي ؟؟؟ ايه الصندوق اللي مش مفهوم ده ..؟؟ .. لا منه دولاب و لا منه تسريحة ..
- انا ححط القمصان في الشوفونيرة يا روحي
- لاااااااااااااااااااااااااااااااااااااا ايااااااااااااااااااااااااااااااااااااك
- طيب انا ححط فرش الشعر في الشوفونيرة يا روحي
- لاااااااااااااااااااااااا ايااااااااااااااااااااااااااااااااك
- خلاص انا حسيب الادراج فاضية انا اسف يا روحي
- لاااااااااااااااااااااااااا اياااااااااااااااااااااااااااااااااااك
بيتحط في امها اييييييه ؟؟؟ مرة يقولك فوط ... ومرة يقولك ملايات ... ومرة يقولك لا ما بيتحطش فيها حاجة اصلا ... !!!!
تحس كدة انهم دايما مخبيين عنك حقيقة استخدام الشوفونيرة عشان في خطر على حياتك ... الموضوع له علاقة وثيقة الصلة بشغل المخابرات !!!
#الكومودينو
الجزء الخشبي اللي جنب السرير اللي بيتجاب عشان تتخبط فيه سواء و انت داخل على السرير باليل في الضلمة ... او وانت نايم اصلا و بتتقلب ... من غير الكومودينو نسبة استمرارك حي اكبر بكتير ... و بتقلل نسبة اصابات الرأس و المخ جدا ... و في وجود الهباب .. المشاكل بتبدأ ... لازم اتنين كومودينو ... لو واحد مفيش جواز ...هو كدة ... طب ممكن تلاتة ؟؟؟ لا هما اتنين ... ايه السناحة دي ؟؟
دايما بتحس انه واحد للراجل و وواحد للست ... و مع كدة .. الراجل لا يتعامل معاه على الاطلاق الا مثلا لوضع ساعة او نضارة او طقم سنان بيتخلع قبل النوم بعد ما سنانه بتقع من الجز عليها في اول 20 سنة من حياته الزوجية ...
طب ما نجيب طرابيزتين لطاف ... ليه كومودينو بادراج ؟؟؟ ايه الحكمة ؟؟؟
لو ما جبتش اتنين ... هل ده في اهانة لشرف العيلة مثلا ؟!!!!
الشرع محرم الجواز من غير كومودينو ؟!!!!
#النيش
تناحة زجاجية مطيولة في ركن المنزل ممنوع اقتراب اي شيء حي او متحرك منها فى قُطر طوله تلاتة امتار !!!!
- حبيبتي انا نازل
- خللى بالك و انت نازل من النيش عشان ما يتخبطش
- سلامو عليكم يا حياتي انا جيت
- حاسب النيش وانت داخل عشان ما يتخبطش
- الباب بيخبط يا جماعة
- محدش يفتح ... اوعوا النيش
النيش بيتم التعامل معاه بنفس طريقة التعامل مع تفكيك القنابل المفخخة ... ست البيت فقط هى من لها حق لمسه ... لو الراجل عدا من جنبه .. الست بتطلب الطلاق على طول ... لو في حاجة وقعت من الراجل جنب النيش ... بيعتبرها ضاعت ... لحد ما الست تجيبهاله بنفسها .. لان استصدار امر اقتراب من النيش ... اصعب من تأشيرة العمرة ..
#البوفيه
حطيت الصيني فين ؟؟ في النيش حضرتك
حطيت الفوط فين ؟؟؟ في الشوفونيرة سعادتك
الفرش حطيتها فين ؟؟؟ في التسريحة جنابك
الاي كلام بيتحط فين ؟؟؟ فى الكومودينو معاليك
طيب ايه لازمة هباب البرك اللي اسمه البوفيه ؟؟؟؟!!!!
ايه ؟؟ المعالق ؟؟ خلاص ... نبيع المطبخ ...
اييه ؟؟؟ الفضيات ؟؟؟ عيني ... نبيع النيش ...
حد يفهمني يا جدعاااااان ...
ايه ؟؟ مممممم ... اه .. كدة فهمت ...
البوفيه بيتجاب عشان يوّنس النيش فى السفرة ... حسبي الله
No comments:
Post a Comment