موسوعه جينص

موسوعه جينص

معاليك موسوعة "جينص" للارقام القياسية ضاربة اخماس في اسداس معاليك علي الارقام القياسية اللي بتعملوها في عدد مرات قطع النور معاليك ... روعة معاليك .. اوكر ...

معاليك انت ممكن توفر مرتب وزير الكهربا و تمشيه و تضم وزارة الكهربا معاليك مع وزارة السياحة ... لحد ما تجيبوا كهربا معاليك ... اه يا شقي معاليك ... بتشجع وزير الكهربا عشان ما يُحبطش .. صح ؟؟

معاليك برضك احنا خلاص وصلنا لمرحلة كويسة اننا من الحر و الضلمة بطلنا نشر عرق معاليك الحمدلله .. بس ده عشان العرق خلص معاليك .. احنا ابتدينا نشر دم معاليك ... هاهاها ... عفريت معاليك ... تخبل ... حنلطم معاليك .. بس مش شايفين نلطم فين

نور علي نور

- الو ... 

- الو .. ايوة اامر

- شركة الكهربا ؟؟؟

- ان شاء الله اامر 

- استأذنك حولني علي قسم "القطع"

- خليك معايا ثواني ... 

ينتظر علي نغمة انتظار "يا نور علي نور" للفنان عمرو دياب ... ثم...

- الو .. اامر

- حضرتكم قسم القطع 

- احنا قسم التوصيل حضرتك .. بس انضمينا علي قسم القطع دلوقتي و بقينا ما بنعملش حاجة غير القطع ... اامر ..

- طيب تمام .. الامر لله ... من فضلك بس ليا طلب مهم .. 

- اه قوي قوي اتفضل ...

- معلش عندي بكرة معاد الساعة تمانية الصبح و محتاج اصحي الساعة ستة الا ربع بالظبط .. ممكن تقطع النور في الوقت ده بالظبط ؟!

الثقب الاسود

الثقب الاسود

انك بتفضل ساعة و ربع تدور على القميص فى الدولاب ... وتدور عليه ... وتدور عليه .. وتبتدى تعيط و انت بتدور عليه ... وبعدين تدور المحادثة التى تتكرر فى كل غرف المحروسة

صرخة مروعة

- "مااااااااااااااااااااامااااااااااااااااااااااااااا"

* "نعم ؟!!"

- "القميص بتاعى فين ؟؟"

* "عندك فى الدولاب"

- "مش موجود وبقالى ساعة بدور عليه فى الدولاب و مش لاقيه"

* -"عندك فى الدولاب"

- "يا ماما و المصحف ما موجود فى الدولاب . انتى اكيد غسلتيه"

* "عندك فى الدولاب"

- "يا ماما مش فى الدولاب و انا خلاص زهقت من كتر الحاجات اللى ضيعتهالى حرام عليكى"

* "عندك فى الدولاب"

- "حرام و الله ... اخرج ازاى انا دلوقتى ..

 والله ما انا خارج عشان ترتاحى"

* "ولو جيت طلعته من عندك فى الدولاب ؟"

- "يا شيخة بس بقى بلا بتاع .. حرام عليكى "

ثم تظهر الماما اتية فى الطرقة

 متوجهة الى الدولاب ماددةً ايديها فى الرف الاول الملاصق للوجه بدون ان تنظر

 وبسحر اسود ما  و بعمل من الاعمال السفلية

 وبطريقة تجعل سحرة الفودو و ملوك الجان و السحر الاسود شوية عيال بتعمل بيببى على روحها .