يعني ايه مصر زيرو ؟؟؟

يعني ايه مصر زيرو ؟؟؟

-يعنى يقولك ان من اهم انجازات عصر ما بعد الثورة هى مجانية التعليم.....و اى اسرة فى مصر بتبيع اللى وراها و اللى قدامها علشان الدروس الخصوصية!!!! 

-يعنى يعملوا مؤتمر سنوى لإنجازات الحزب الوطنى ......و الناس كلها عارفة ان مؤسسة رسالة هى اللى فاتحة بيت ناس كتييير قوى فى البلد!!!!

-يعنى ابويا يسافر و يتغرب و يوفر شقة لولاده من فلوسه محدش دفعله فيها حاجة و يجى بطرس غالى يفرض عليها ضريبة عقارية.!!!!!!!!

- يعنى حسنى مبارك يعمل سور لقتل اطفال غزه ....ويطلع واحد يقولك البرادعى عميل لاسرائيل

- يعنى وزير مالية عمل قانون الضرائب العقارية وقال هيدفع عن القصور بتاعته ويطلع يتعالج على نفقة الدولة

- يعنى وزير صحة شريك فى كبرى مستشفيات البلد-دار الفؤاد- و مراته تتعالج على نفقة الدولة

- يعنى ناس غلابة و مش لاقين الزلط حتى وعضو مجلس الشعب يطلب منهم ثلث قيمة قرار العلاج على نفقة الدولة رشوة عشان يتعلجوا على نفقة الدولة

- يعني ندي الغاز لإسرائيل مدعم لعشرين سنه جايه و المصريين مش لاقيين أنبوبه بوتاجاز

- يعني وزير الإسكان يبقي سمسار اراضي ! ووزير الصحه بيتعالج علي نفقة الدوله !

- يعنى جمال مبارك يسرق فلوسنا وارضنا ويوزعها على اصحابه ...و ييجى واحد يقولك اللى تعرفو احسن من اللى ما تعرفوش

- يعنى تبقى واثق أيام اختيار الدولة المضيفة لكأس العالم 2010 ان مصر هاتخدها هاتخدها لإنعدام الأمن فى جنوب أفريقيا و عدم وجود بنية تحتية فى المغرب و فجاة تاخد صفر كبييير من لجنة الفيفا

- يعنى يطلع واحد فى التلفزيون يقولك آه البرادعى ...عارفه عارفه دا حمدى غيث بتاع انا البرادعى يا رشدى......... و يبقى تامر حسنى و شعر صدرة من علامات الرجولة و لا حول و لا قوة الإ بالله

- يعنى يبقى عندك ثلث أثار العالم فى مدينة واحدة بالأقصر و تلاقى دولة زى تونس عدد السائحين فيها اكتر من عندك

-يعني تترشح في الانتخابات عن فئة (العمال) وتنجح فتعيش عيشة (الملوك ) 

-يعني  تمنع التدخين جوه القطارات علشان تحافظ علي أرواح الناس ويروح القطر بكل اللي فيه مخيش في قطر تاني.

- يعنى تبقى الدول العربيه اللى مكانش حد يسمع عنها زى دبى وقطر والبحرين كلها نظام ونضافه------ واحنا اللى كنا بنعلمهم من 30 سنه الزبالة وعدم النظام في كل مكان ورئيس الوزراء بيقول ان وجود الزبالة بالكثرة دي بيدل على الغنى الي عايش فية الشعب المصري

- يعني تبقة نسبة التحرش الجنسي بالفتيات في الشارع المصري والمواصلات العامة 80% .....والحكومة تطالب بخلع النقاب !!!!

- يعني لما الشعب ما يلاقاش سكن ويروح يسكن في الجبل ويقع علي نفوخه فيقولوا عشوائيات

- يعني لما الناس تتغرب ولما تيجي ترجع تركب عبارة تعدي بيها البحر والعبارة تغرق وحوالي 1500 واحد يموتوا .... يطلع التحقيق انهم ماتوا بنزلة برد عشان لما غرقوا ماكنوش عاملين حسابهم وماتقلوش هدومهم

- يعنى قناة ال BBC فيها مذيعات محجبات و تلفزيون بلد الأزهر بيمنع ظهور المذيعات المحجبات!!!!!!!!!!!

- يعني مصانع الحديد كانت بتبيع الطن ب2000 جنية ويجي بقدرة قادر احمد عز محتكر الحديد يبيعه ب8000 جنية ........ تيجي الحكومة تعمله قانون تفصيل مخصوص لية عشان تحمية من بطش الناس

- يعني يبقي اليهود نهبوا فلوس العالم عشان الهولوكوست الوهمي ويتباهو بقتل اسرانا في تليفزيونهم ومحدش يقولهم حاجه !

- يعني يعملوا قانون ضرائب جديد على العقارات ....... والشعب الي مش ناوي يدفع يموت نفسة عشان يجيب الاقرار ويتباع في السوق السودا كمان

- يعني وزير التربية والتعليم المسئول عن تخريب الثانوية العامة وتعديلها اكتر من مرة خلال 4 سنوات والغاء سنة 6 من الابتدائي ..... يكون رئيس مجلس الشعب وممكن رئيس جمهورية كمان في حالة وفاة الرئيس

- يعني قطارين يخيشوا في بعض والي يتحاسب الكومساري وفي مقولة اخرى البقرة الي كانت واقفة على القضبان

- يعنى تروح مستشفى حكومى وتجيب كل حاجة على حسابك(قطن وشاش وأدوية ) ناقص كمان دكاترة وممرضين ووزير المالية وزوجة وزير الصحة بيتعالجوا بالملايين على نفقة الدولة

-يعني تبقي عندك بحرين و نيل قناة السويس و11 بحيره وبتستورد السمك من بره

-يعني ربنا يكرمك وتكون رجل اعمال ولا سيدة اعمال وتاخد 2.800 مليار جنية مصري من 10 سنين وترد نصهم بالتقسيط بعد 10 سنين يعني المبلغ بيكون اضاعف معاك تلات اربع مرات وتكون برئ قدام الحكومة وكمان تنزل انتخابات مجلس الشعب وتنجح!!!!

-يعني يتحرق مجلس الشورى والشعب يدعي ربنا ان النواب يكونوا جواه

- يعني الاعلام الحكومي والخاص مش همة الشعب الي مش لاقي ياكل ولا يلبس ولا يسكن وطبعا بدون عمل ...... وهمة كلة يعرف مين قتل سوزان تميم والمحكمة هتحكم باية في قضية مرتضى منصور وشوبير !!!

- يعني الدايرة الي فيها 2500 صوت مرشح الحزب الوطني ياخد لواحدة 13000 صوت

- يعنى لما يكون يكون المزارع مش عارف يزرع ارضه بالقمح علشان نحتاج امريكا ------------ ولما يزرعه ياخدوه ارخص من المستورد 3 مرات

-يعني يمنعونا من زراعة القطن الي بنتميز بية وبعد كده يروحو يبيعوا مصانع الغزل والنسيج لمستثمرين يهود يسرحوا العمالة ويقطعوا الشركات ويبعوها اراضي على النيل

- يعني الحكومة عليها ديون داخلية وخارجية تبلغ 991 مليار جنية يعني نصيب كل فرد في مصر سواء طفل او بالغ او رجل او امراءة 13 الف جنية يعني من الاخر كده الولا عمر ابني مديون ب 13 الف جنية

-يعني يكون الملاك فى الرحاب بتدفع 12 جنيه على المتر مسطح بدل فرق الصيانه ---------- يقوم الباشا هشام طلعت يدى سوزان 50 مليون من جيب امه

- يعنى لما تكون اقصى سرعه للسيارة 20 كيلو فى الساعه علشان الطرق متنيله بستين نيله والبلاعات طالعه فى وسط الشوارع واحيانا مفتوحه -------- يطلعوا لنا بقانون حزام الامان وصندوق الطبى علشان ابو مرات الننوس يبيع ويغتنى من دمنا

-يعني الموظف فى الحكومة بياخد 500 مرتب و يقولك مش عارف يعيش علشان الزيادة السكانية!!!!

-يعني يكون عندنا مجلس قومى للمرأة و اعلى معدلات طلاق فى الوطن العربى!!!!

-يعني يكون عندنا مجلس قومى لحقوق الانسان و اعلى معدلات اعتقالات و تعذيب فى اقسام الشرطة.....

- يعني وزير الاسكان الحرامى يبيع ملايين الامتار ببلاش للمستثمرين مخالفة لقوانين الدوله ------------ ويبيعوا لنا المتر ب 3000 جنيه فى القاهره الجديده

- يعني وزير الاسكان يقول لو مخصصتش الآراضى للعائلة أمال هخصص لمين ,,,يبقى اللى اختشوا ماتوا!!!!

- يعني بيصرفوا ملايين الجنيهات على المهرجانات و المؤتمرات كل سنة و اول ما يحصل كارثة - كالزلزال او السيول - يقولك اتبرع للضحايا!!!!!

- يعني طلعت السادات قال بقين على الهوا تترفع عنه الحصانة و يتسجن فى اقل من شهر... و ممدوح اسماعيل صاحب العبارة يسافر من صالة كبار الزوار!!!!!

- يعنى تجى تشترى شقه فى اسكان مبارك لمحدودى الدخل تحسبها تلائها وائفه عليك بسعر السوبر لوكس

- يعني الرئيس يحتفل بليلة القدر و يوزع جوائز على حفظة القرآن الكريم.... و لما الاخوان يجيوا يعملوا حاجة ايجابية - زى مشاريع خيرية او حتى يوزعوا شنط رمضان - يعتقلوهم و يقولوا لا للدولة الدينية!!!!!!

- يعني تتهد على اهلها يطلعوا يقولوا هم اللى غلط دول عشوائيات.... و كنتى فين يا حكومة على رأى معتز الدمرداش؟؟؟؟!!!!!!

- يعني يعملوا قانون مرور جديد..... و ضحايا حوادث الطرق سنويا اعلى من نسبة اللى ماتوا فى حرب اكتوبر!!!!

يعنى كولا زيرو

و غاز زيرو

و مرتبات زيرو

و ضمير زيرو 

و تنمية زيرو 

و انتخابات زيرو

و صحة زيرو 

و دقيق زيرو

منقوله من مدونه ميكروباز مصر