نور علي نور

- الو ... 

- الو .. ايوة اامر

- شركة الكهربا ؟؟؟

- ان شاء الله اامر 

- استأذنك حولني علي قسم "القطع"

- خليك معايا ثواني ... 

ينتظر علي نغمة انتظار "يا نور علي نور" للفنان عمرو دياب ... ثم...

- الو .. اامر

- حضرتكم قسم القطع 

- احنا قسم التوصيل حضرتك .. بس انضمينا علي قسم القطع دلوقتي و بقينا ما بنعملش حاجة غير القطع ... اامر ..

- طيب تمام .. الامر لله ... من فضلك بس ليا طلب مهم .. 

- اه قوي قوي اتفضل ...

- معلش عندي بكرة معاد الساعة تمانية الصبح و محتاج اصحي الساعة ستة الا ربع بالظبط .. ممكن تقطع النور في الوقت ده بالظبط ؟!

- ثواني كدة اشوف جدول القطع عندي .. ستة الا ربع .. ستة الا ربع .. ممم .. بص احنا حنقطعه من ستة بالظبط ... عشان حيكون موجود من خمسة و نص لستة بس الليلة دي .. 

- معلش ارجوك خليها ستة الا ربع عشان الحق اتشطف و كدة ..

- ايه ده ؟!! تتشطف ؟؟ انتو عندكو مية ؟؟

- لا خالص .. بحوشها من بليل في باستلة .. المهم ... ارجوك بدر القطع ربع ساعة .. 

- يا استاذ ما ينفعش .. !! في نظام حضرتك ..

- ارجوك .. ده معاد مهم قوي انا رايح اقدم علي وظيفة ... 

- مبروووك .. فين ان شاء الله ؟!

- عاوزين محصلين نور جداد في الوزارة عشان بيقولوا جزء كبير منهم اتخطف و الباقي متوزع بين اقسام الرعاية المركزة في المستشفيات ... 

- ايه ده ؟ معقول الكلام ده ؟ حتبقي زميل معانا ؟!! لا لو علي كده بقي خلاص .. يا باشا حقطعوا عليك من ستة الا ربع بالظبط ... 

- الله يكرمك يا رب .. بص .. احتياطي بعد ربع ساعة رجعوا دقيقة و اقطعه تاني عشان المروحة تشتغل و تقف اقوم اصحي .. تمام ؟؟ 

- من عيني ... الف الف مبروك و بالتوفيق .. الهي ربنا يكرمك كده و تقدر تحصل فاتورتين ورا بعض و تفضل عايش