اتنين صباحاً
::::::::::::::
النور ملو الشوارع
ومليون راديو والع
...الساعة اتنين صباحاً
لاكن إيه الموانع!
.... الخلق رايحه جايه
والدنيا لسه حيه
مليانه بالئهاوى أو
وزعيق القهوجية
.... واحد يقول لواحد :
خليك ياعم قاعد ،
التاني يقول له : شكرا
ده أنا م المغرب مواعد
فيه سهره لسه عندي
في بيت فلان أفندي
ح ناكل حاجه حلوه
ونشرب تمر هندي
واللي تروح دالقه جردل
فوق حضرة المبجل
طبعاً صاحبنا يزعل
وينفجر شتايم......
والحي كله يوصل
مابين مصلح ولايم
اللي يقول :
يا جماعة ......
واللي يقول : يا بهايم .....
ومطرب الإذاعة
يصرخ وف وجده هايم ..
ولو طرطقت ودنك
في وسط دي العظايم
تسمع مسحراتي
بطبلة صوتها واطي
بيقول :
اصحي يانايم
صلاح جاهين
No comments:
Post a Comment