2012/01/12


قبل الطوفان الجاي
....
سيد حجاب



تاج راس سلالات الجهالات الطغاة الصغار..
ذوي المقامات والمذمات اللصوص الكبار...
أصحاب جلالة العار
أصحاب فخامة الإنبطاح والسعار..
أصحاب سمو الخسة والإنحدار..
أصحاب معالي الذلة والإنكسار..
( ماأقصدش أصحاب الجلالة والفخامة الصالحين
ولا حتى أصحاب النبالة والأصالة المصلحين..قطعا )
أصحاب قداسة الإنعزال والفرار
أصحاب نيافة الجبن والإعتذار
أصحاب سماحة النقل والإجترار
أصحاب فضيلة الغل ع اللي إستنار
( مش قصدي أصحاب الضمير الخيرين شرعا!!
واللي شرفهم ماعليه طعن!! )
جميع ولاة الأمر, دنيا ودين
كافة عموم الساجدين...للدولار
من بعد حمد الله ..وبه نستعين
وبإسم ناسنا الطيبين أجمعين
وبالأخص النيرين الكتار
وبإختصار
من غير تحية وسلام
ماهو السلام لله .. ومش للطغاة!
ولا للي عن
حقه نام!
وده غير سلامكو..بتاع أرامكو
اللي ماحدش رآه!!
سلام كلام..ملغوم..ومسموم..وعار
حاولتوا نشر ثقافته في كل دار
ثقافة إستهلاك وجهل وبازار
فيه الضمير معروض ...شرا ...بيع...إجار
وخليفة الله..
( إبن أدم .. زيه زي الحمار )
بين "مول" و"مول" يرمح يشبرق عينيه
شاري دماغه .. وروشنة طحن نار
وليل نهار.. منهار.. متنح سفيه
وعمره لحظة طيش .. وشرفه هزار
عايش حياة أغوات.. بأخلاق عبيد
يديها "بيج ماك" ..بيبسي..شيبسي..فشار
يحلم بـ"هيفا" ويصحى مهزوم وحيد!
يخش ع الشاشات بشوق وإنبهار
ويعيش في وهمه سعيد..!
وإن حشت النار عشة في قندهار
يقول في باله: أفغانستان بعيد..!
وكل ناسها..إرهابيين أكيد
ويبلع الأخبار .. بشاي الفطار
وحين تشب النار وتشوي الصعيد
ويهل شيخنا وأبونا إيد حاضنة إيد
وكل واحد له حدا التاني تار
يقول مثفقكو السلامي..الإنهزامي البليد
ده خلاف بسيط واتسوى..بين جار وجار
وإن سار نظام صدام بعكس المشار
لهم بصابع الهزأة والإحتقار
تدمروا بغداد هارون الرشيد
وترموا تاريخ العراق في النار
وتصلبوه على حافة الإنتحار
رافعين شعار عار..شرق أوسط جديد..!
ويقول مثقفكو الحرامي الإمعة المستفيد
وادي الأمارة..
الدم ده دم الخلاص للوليد!!
ولما تختار "غزة" تحت الحصار..
نهج المقاومة .. تقولوا:"بئس الخيار"
وتشبعوها حصار..وجوع..وإنهيار
يقول مثقفكو بهوان العبيد:
"حماس-مدانة" ..وشعب غزة عنيد..
وده عقاب مين عاب في حق الكبار..
وإن إستجار..لايُجار
ويوم مانصر الله يقوم بإقتدار
ويفل بإرادة الحديد ...الحديد..
ترغوا بسفه..
بتحسبوه ..فلسفة..
وتصرحوا بشفقة وشماتة مقرفة
دي خسارة لسياحة وتجارة وعمار
دي مغامرة مش محسوبة ومكلفة
ويخش لبنان معمودية النار
وبعد وقفة عز..صار لإنتصار
وإنهار طاغوت العنكبوت وانكفا
والعجرفة إنكسرت وزهوه إنطفا
جايين تلموا الدور .. وتلووا اللي صار
أول كلامكو الإنتصار إتنفى
وحسبتوا حسبة بالدينار والدولار
رغم إعترافات العدو بإنه كلها عالقفا!
والوقت بتحاولوا..بحيلة ولفلفة
تجردونا من السلاح بالحوار
وتجرجرونا ضعاف لبرتيتة قمار مجحفة
ويقول مثقفكو بغبا وعجرفة:
"ده سلاح هلال شيعي..وخطر ع الجوار,
(وكأن يعني إسرائيل جار..وجار!)
وبلاش مقاومة..كفى مقاومة ..كفى
وبالمداومة.. ع المساومة.. التسوية المنصفة
ح نجيب سلام فيه الشفا والإزدهار!
وينام سلام فياض جوار الجدار..
على ريش نعام
يحلم بمن وسلوى متستفة
ومبادرة...بعد مبادرة..دقنا المرار
في دنيا كوسة..وقرع طلع خيار..
إشي أردني..أشي اوسلو..وإشي في الخفا..
وإشي في العلن..ودي تهدئة..وده إنفجار
تلاتين سنة .. وأنتو على زحلفة
من خيبة لمصيبة..ومن عار لعار!
بإدارة نيه..ونِية متكتفة..
بتدفعونا تمن سلامكو اللي اتولد في الحرام
يا أجبن الحكام..
ياغرقانين في طين جهالة وعطن..
مفيش سلام بين بندقاني وحمام..
والديب مازال ديب مهما غنى ورطن..
يا أجهل الأصنام
يامهرولين بره التاريخ والزمن
الإستيطان ...عمره مايبقى وطن
ماحصلش مرة أمر واقع ودام
واللي جرى لمانديلا درس وعلام
العودة حق..مايتقايضش بتمن
والقدس عاصمة شعبها المؤتمن
وسلامنا جاي جاي
رغم أي كلام وأي ضلام
وكأنه شمس الحق شق الغمام
وإصحوا بقى للكلام:
غزة في حصار..الإنسانية في خطر
وبينفلت من بين إيديكو الزمام
سلامك الموؤود في مهده إنقبر
وشعوبنا طلاب حق طلاب سلام
ومع الجميع..إلا وحوش التتر
وسلامكم إستسلام
وبرغم ضمانات عمكو"العم سام"
سلامكم إبن الحرام
لاكان ولا حيكون ولا له أثر
ياللي إتعميتوا جشع .. وجبن .. وبطر
والإستكانة للمهانة سابتكوا أشباه بشر
والذمة معدومة .. وضميركم حطام
ليل الخيانة عمي بصيرة وبصر
والحق نور يجلي العقول والنظر
والشعب رب الدار..ورأيه تمام
يقول كلامه..ويستجيب القدر
يعني إسمعوا وعوا .. شعب قاوم وقام
أو ح تلاقوه.. قامت قيامته وزام
وكنس عليكو المقام
وح يستجاب لدعاه..وإلا إنفجر
وإن لم تبصوا له بعين الإحترام
تستاهلوا ميت مليون...حذاء منتظر


جميع ولاة الأمر دنيا ودين
كافة عموم ضلالية مستأسدين
مستفردين بالأمر..متنمرين
كل اللي لابدين فوقنا ومأبدين
ياللي إنتو مش منا
ولا إنتو أصحاب فضل ولا منة
بس إنتو حاكمينا وشاكمينا وظالمينا
بالجهل والعجرفة
وآيات كتب دموية متحرفة
فيها عشرميت إن ومآلمينا
ياعقول قديمة خالية م المعرفة
عديمة القيمة.. ماليها إلا القديمة شفا
ياعيون لئيمة في الكدر والصفا
(لكن كريمة من اللي شوفها إختفى)
ياقلوب سقيمة..سئيلة مستظرفة..
توعد وتخلف..ومجافية الوفا
ياديول خيول منفوشة متزخرفة
حقيقتها باينة لكل مين له عينين!
ح تعملوا إزاي في الطوفان الجاي؟!
ح تهربو لفين منه ياغفلانين؟!
لا ليكو حجة..ولا الزمان نساي؟!
ولا إنتو شايفين الطوفان جاي منين!
بالعقل يعني...ح تشوفوه
أو تعقلوه إزاي؟!
وعقولكو موضة قديمة..ع الزيرو
أصولية تقفيل عصر "طومان باي"
فاضية..وملانة هوا..اتخنق طيره
وطوى الجناح
راح يابا في الباي باي
عقول غباها بكر..وبخيره
لو طالها فكر..تدور..تجعر: جاي
زي "ابن باز"ما أجاز له تشخيره
تكفير جاليليو وميكي ...والترماي
جاي الطوفان..حتوقفوا سيره
وميت يمين..لاتقدموله شاي
ولابد ماتبدوه على غيره
ولا ح تجروا توحوحوا : ياامااي!
وكله يجري يخش لسريره
ويكش يتخفى ورا صباعه وضوافيره
ولا ينط النطة .. زي الياي
لورا جدار عزل ياما طلبنا تكسيره
ولا يروح واخد أضابيره
لمنطقة خضرا...بقت حمرا..يامولاي
ولا تواجهوا بشراسة بلطجية قواي
وتجرجروه بحزام في مناخيره
ع المحكمة اللي فـ"لاهاي"
ينطس حكم يلوص في تفسيره
ينشل تفكيره
ما انتوا القواي الغناي
و ح ترسموا له مسيرته ومصيره
لاه..إنسوا ماتفكروش
وتفكروا ليه؟ وانتوا ماتستروش
حبة ديول فوق كروش
وعشوش فاشوش ع العروش
يمكن ماتوعوش لما يجي الطوفان
إلا وقد كان فجأة غطى المكان
و ح تعرفوا لما يطول التيجان
إنه أقوى منكوا , إنتو .. وبيجن .. وبوش
وإنه جاي من الجهات الأربعة
يغسل هوان السنين
فيضان خيول مخبولة متصربعة
أمواج..وتطوي الأمعة السعرانين
تكسح تيجان حكمت بحطة وضعة
وعروش خيانة خاوية متصدعة
وكروش وحوش سفت دِما الشقيانين
جاي الطوفان هدار ومن دار لبيت
لقصوركم العالية..ومالكم مغيت
إكمنه جاي من غيم غباكو الغتيت
م العمى فاض...غمى الجبين والعينين
جاي من جشعكو وحرصكو المستميت
ع العمى والكرسي وحكم الفساد
لبلاد في سن الرشد..فاقدة الرشاد
جاي الطوفان في ميعاده"ياقوم عاد"
جاي من دموع تماسيح في وول ستريت
بيغنوا دور "أنا هويت وانتهيت"
وآخرة الزمر العبيط طيط وطاط
جاي م الحرملك..ولا جاي من المبلاط؟!
ولاكتر نوح يشفع ولا فلك نوح ينفع
ده طوفان هاج وماج ع الجبال
آه ياشماتة كارل ماركس فيك يارأس المال!
ميزانك إختل..مال
بين السطوح والسفوح
والطم ياراس المال خدودك ونوح
ويادنيا دوري..إنزاح ياليلنا وروح
من الساعة دي الدنيا ح تروح شمال
من فوضى إنتاج..لإرباك إقتصاد
للإنكماش..لبطالة فوق الإحتمال
ومن جنون زاد بين مضاربة ومزاد
ومن توحش رأسمالي لكساد
من إكتمال نقص لزوال الإكتمال
لا الأشيا معدن ياد ولا الحالة عال
وأتاريه سراب كداب خايلنا وزال
وقصور رمال ع الرمال
وآدي اللي كان ماركس مشاور عليه
واللي "لينين" النبيه
خالفه وسعى لحصاده قبل الأوان
واللي ابراهام لنكولن ماحلمش بيه
آدي أعتى بلدان الزمان ..إستكان
ونقى واحد من لامريكان لافريكان
على الله يلقى الحل
ده اللي في ايديه
يشفي إختلال الميزان
بين وفرة كافرة..وهيمنة وهيلمان
وبين شقا وحرمان في عالم سفيه
ومابين جنون البنتاجون الجبان
وبين شعوب تحلم بعالم نزيه
لايبعها ولا تشتريه
ودي مش نهاية التاريخ
دي قيامة قايمة..جايبة داغ المسيخ
أبو رأسمال دجال كريه ألعبان
فساده كان منه..فيه..



يامعشر القانيين ألوف ملايين
ياخيخة ياطريين..ومقريين..ومهريين ومش قادرين!
ياللي إنتو ناسيين
إنكم رايحين ومش جايين
يا أيها الفانيين
جاي الطوفان من فضل رب العباد
على الغلابة في زمانا الضنين
جاي يمحي من ساد بالفساد في البلاد
ويحمي أحلام أهلنا العشمانين
ويحيي في قلوبنا الحنين والعناد
جاي من دموع ناسنا العدالى البساط
أو شربتات ليلة فرح وانبساط
أو من براكين الآهات والأنين
جاي الطوفان جبار.. وح ياخدكو باط
وانتو وعيالكم غرقانين..غرقانين
جاي الطوفان..جاي شايل الماضي
يكسح في وشه الماضي والحاضر
فيه طيبة زادت هيبة القاضي
له نظرة النسر في عيون"ناصر"
لنصر "نصر الله" اللي كان قاضي
وبشرنا بالمستقبل الناضر
جاي رمح..رمح..تقولش مش فاضي
يؤمر وأرض الله تقول:حاضر
وترضى حكمه ولا مش ..راضي
الأمر أمره ..وعزرائيل حاضر
وبكره للناظر
قريب...بدون مانقول ولا نصادر



سرح خيالي في منام..
شفت الطوفان جا..وبوداعه وسلام
ورمى عليكو السلام
سلمتوا بإيدين نجسة من عار السلام بالإيد
على سفاحين غزة عليها السلام
سحب إيديه ورمى السؤال من بعيد..:
عملتوا إيه في السلام؟
قلتوا له سمسمناه..وسممناه..
وسمناه..وعممناه..وسلمنا
وعملتوا إيه في النظام؟
رديتوا: أسسناه ..وهندسناه..
وقدسناه..وعسعسناه..وسلمنا.!
وعملتوا إيه في العلام؟
قلتوا له: خسسناه.. ودجناه.. وكسكسناه..
ولجمناه..وبلمنا!
وعملتوا إيه في الرأس مال الحرام؟
رديتوا: لملمناه..وأسلمناه..وكومناه
وعومناه..وتلمنا!
قال الطوفان: ماليش معاكم كلام
ولقيتني باصحى وأدوب في قلب الزحام
ورأيت فلسطين قايمة من بين الحطام والركام
في غزة وصمود غزة للعدوان يعلمنا




جاي الطوفان..ياخال
شيء لا خطر على بال
ولا يطوله..ولا يحوطه خيال..
طوفان بقى..مش سيل ولعب عيال!!
فيضان جنون...يغلي بغضب مخزون
براكين نيران تنشق عن أمواج في ريح مجنون
وسيول خيولها حرونة لاتعصى عليها تلال
ولابروج عالية وأعالي جبال
لكنه طوفان برضه فيه روح إنسانية حنون
يقرا العيون
يقرا اللي في قلوب البشر مكنون
وعنده ألف جواب لأعوص سؤال..
تقولش أنكشفله سر الكون!!
يقى عبد رباني يقول (للشيء كن..فيكون)
ولا ولي وعارف من العارفين
ده عارف أنتو ليه كده أندال!
وكلكم مع بعضكم ..إيد واحدة مختلفين
بتقدموا لناسكم دسم فيه سم
ومشيتوا ورا مجانين ومنحرفين
في المنظرة والجخ ... محترفين
وغواة زنا..حتى بوطنكوا الأم
عايشين على التساليك وع الأسافين
والطبالين واقفين على الصفين
عيون غليظة وكدب ملو الفم
شايفين غبائكوا اللامع الجبار أخدنا لفين؟!
من جهلكوا...بتستهلكوا...مال أهلكوا
ومن أهلكوا خايفين!!
ومع اللي شربوا دم أطفال قانا متحالفين!!
والدم غطى الكم
فرسان هلاوس..كوكايين زايفين
وخسرانين دنيا ودين...ودون وحالكوا يغم!!
سممتونا بالتسويف وبالتخويف..
سقتونا بالتدجيل وبالتضليل..
بعتونا واشتريتونا بالتزوير وبالتزييف
وشعوبكم اللي يفترض أن إنتوا حكامها
بهدلتوا هندامها..
شليتوا أقدامها
بعترتوا راياتها وكرامتها وأحلامها
وبالأصفر الرنان وحد السيف..
نجستوا بيت مقدسها وحرمها
ركعتوا أهرامها
لأولاد حرام ..وزمن ضلالي سخيف
وفي عز ما إنتوا في خريف تخاريف
صدح بلال بالأذان..
أذان صلاة الطوفان
بصوت كأنه نسمة من الجنة في ليالي الصيف
الجاه لكوا..ومن جهلكوا
لانجاة لكوا ...إن جه لكوا
طوفان يشيل ويزيل
ماعادش ينفعكوا لاتجهيل ولا تجميل
وماعادش في إيديكو ولا تسوية ولا تسويف
جاي الطوفان
جاي واللي بعده مخيف

جاي الطوفان والجاي بعده مهول
حيقول ويعمل حاجة فوق القول
وقوالته فعل وكلكم مفعول
به..مش لأجله...بس مش حاسين
جاي ينصف المعقول من المنقول
وينصر المظلوم على المسئول
ويهزم السيف زي دم "الحسين"
بالوصل بين العلة والمعلول
وبزقزقة فيروز وشدو القمرى والحساسين
بصفاء "سما" مولاي جلال الدين وسورة "ياسين"
وبعزم "جيفارا" و "يسوع" والشهداء القديسين
وبزهد "غاندي" وعقل "طه حسين"
وبحلم "بوليفار" وتفسير "شافيز"
وبانتفاضة القدس ع النخاسين
وبانحسار الصهيونية ووهم "شمعون بيريز"
جاي الطوفان مالهوش كبير أو عزيز
لا أبالسة متغطرسين
ولا إمعة موالسين ولا مدلسين
جاي الطوفان ..أمواج ورا أمواج
من هارلم السمرا وضفاف السين وقلب باريس
ومن اليونان والصين وبغداد الرشيد وبراج
شبان..صبايا خضر ..متحمسين
فرادى أو أزواج
جماعات وأفواج جايه ورا أفواج
من آسيا من أفريقيا..وبلاد اللاتين لامريكان
قاريين بريخت ولوركا..ويامنوا ببني جبران
شايلين رايات المجد للإنسان
خليفة الرحمن
قلوب لايغويها دهب ولا جاه
ولا تتنفض من الخوف من الكرباج
جايين وحالفين ياخدوا تارنا
وتار عبيد الرومان
والوقت آن الأوان
ولكل وقت أدان
ونقول نوينا نقيم صلاة الطوفان
دي الإنسانية غنية رغم اللي كان
وجرس قيامة الإنسانية أهو دق
من المسجد الأقصى وطالعة البتول
تصحي "طيبة" و "هابو" "وأبو الهول"
ويدن الديك والضلام ينشق
ويفج فجر الحق
والشمس تضوي عالعشش من الشرق
وتهب ريح قبليه..روحكوا تطق
تهوي العروش
كما عهن منفوش تزول
نلقى الشعوب بتنول...وتاخد حقها المستحق
ما اللي يستاهلوا الغرق والحرق
من حرموا عالخلق قولة لأ
بيصرخوا على طول بصوت مذلول
ويبصوا بغباوة وعته وذهول
لمصيرهم المجهول
وربنا إسمه الحق
وحسابكم معاه حيطول
والعمر -وإن طال- ياطوال العمر
مايدومش لا للبيض ولا للسمر
وبكرة كل المستخبي يبان
وتفوقوا من سكر الليالي الحمر
على الطوفان جاي في الميعاد غضبان
قاصدكو بالذات..عارف العنوان
يامرحبا...و..
والله زمان يا طوفان
...

7 comments:

Anonymous said...

thanx

أفلام عربى said...

موضوع ممتاز

Entrümpelung said...

مدونة مميزة ... بموضوعاتها المتنوعة :)

Transport said...

شكرا على المجههود

Transport said...

شكرا على المجههود

entrümpelung wien said...

شكرا على الموضوع

entrümpelung wien said...

شكرا على الموضوع